近年「八萬五」呢個名詞，雖然冇乜人講，卻唔等於不存在，有人指呢個政策累死好多人，甚至禍延後代，遺害十分深遠！樓市都幾級跳啦，咁講誇唔誇張啲呀！八方唔識作大，有片為證先咁講。
前晚亞視播出香港電台同全港青年學藝比賽大會合辦嘅「小學校際通識大賽2008」，呢啲小兒科問答比賽，正常情況下有幾多人睇不問可知，前晚嗰集卻反常，播出後即時有網友將節目上載，瞬即熱爆互聯網，hit到爆！
點解咁多人爭住睇呢？因為有個小學生答問題時十分出位，主持人麥潤壽問參賽者：「形容一個人有逃避問題嘅性格，會用甚麼政策呢？」正確答案應該係鴕鳥政策，點知藍田循道衞理小學三個參賽學生卻創意爆棚，隊長鄭皓澄同兩個同學仔商量一陣，竟然寫上「八萬五」三個字！
呢個答案雖然錯，不過錯得精采，全場頓時笑到反肚，觀眾都拍案叫絕。女主持Anna姐姐大讚好有創意，麥潤壽直情忍唔住笑，「是但推個八萬五出嚟，跟住話冇嘞八萬五，（呢個）答案又講得通。」小學生童言無忌，慘被「八萬五」重創嘅負資產業主聽到真係哭笑不得，麥潤壽更建議，「正確答案應該取消，你呢個答案有創意，下次比賽時，呢個係modelanswer。」

八方噚日問鄭皓澄點解寫出呢個答案，佢話其實佢哋唔識答，只係靈機一觸，記得幾年前睇新聞，有記者追問老董八萬五政策問題，老董聽而不聞笑住走人，所以佢提議咁作答，「我覺得一諗到逃避問題，好多人就諗起董建華先生。」鄭皓澄坦言，唔清楚「八萬五」實際係乜政策，只知同樓市有關，「總之係唔啱啦。」
除咗老董為人「八萬五」，鄭皓澄又話現任特首煲呔都幾「八萬五」，近期副局長風波拖延交代就十分「八萬五」。鄭皓澄父母都係中學教師，家住藍田滙景花園，但唔知父母係咪負資產。佢話大個都想做老師，又希望做專欄作家。佢全級考第一，9月升中一，首志願係九龍華仁書院。藍田循道衞理小學陳翠珍話，學校六年前推行通識教學，培養獨立思考同創意，小六畢業生要交一份報告，可能咁學生幾關心時事。
小學生咁樣理解「八萬五」，聽落好笑，其實可悲，反映當局不願承認施政失誤，唔敢詳細向學生解釋何謂「八萬五」，好似對「六四」咁避而不談，呢個政府真係「八萬五」。
重溫比賽過程，可瀏覽以下網址
http://hk.youtube.com/watch?v=jLWMIAFyRKg

mailto:[email protected]