【體能挑戰】15日內跑24個城市謝票 吳君如:明白陳可辛點解成日唔係屋企
吳君如謝票妖鈴鈴
吳君如首次執導新片《妖鈴鈴》今個月29號香港上映,屆時將同大家笑住跨年迎2018。
為咗宣傳自導嘅首部作品,君如終於嚐到前所未有嘅走戲院宣傳之旅,由前日起,佢一口氣喺15日內,喺大陸24個城市,每日最多走18間戲院,少則都有10間,估計謝票同見面會超過250場以上。而最後一站就係27號嘅香港首映禮。
要一口氣跑24個城市,對君如嚟講絕對係一次體能挑戰,佢笑話終於深深體會到做導演比演員更辛苦:「終於明白陳可辛點解成日唔係屋企。」
為咗應付24個城市嘅優先場謝票同分享會,君如同監製陳可辛拍住上跑足全程,前天佢哋兩個着住道士袍,手執桃木劍現身戲院同觀眾見面,由佛山開始展開首站行程。陳可辛同君如都好hyper,好似開party一樣,對於自己呢身道士袍襯波鞋look,君如笑話絕對係限量版,仲話係2018時尚icon。
繼佛山同東莞兩站後,今日君如會去將深圳站做宣傳,經歷過兩日行程,君如話:「好彩我一直都有做開運動,第一日跑佛山站,已經一口氣跑咗17間戲院,真係無得頂!一直以嚟我覺得做媽咪係頂級辛苦,原來做導演先係真正頂級辛苦,簡真玩緊體能賽。做演員宣傳,最多出席一兩個首映或者活動,但今次真的不得了,仲要犧牲埋我同囡囡過聖誕機會。」
更多娛聞,喺晒《娛果》
http://fb.com/appledailyent