台灣男歌手蕭敬騰嘅世界巡迴演唱會已經移師到美加當地，上星期六唱完溫哥華站，聽日（18日）就會唱到多倫多站，其後仲會去埋洛杉磯等地。以為老蕭可以有得飛、有得玩、有錢賺好爽呀？佢去到當地第4日，已經飽受時差折磨，仲話唱4場但要調3個地區嘅時差，搞到佢忍唔住喺第一場騷後向經理人公司申請：「美、加場以後我可以封咪不唱了嗎？」

據台灣傳媒報道，老蕭極怕坐飛機，但今次真係為咗美加等地嘅歌迷「挑戰極限」，佢已經特登提前兩日到溫哥華準備，點知過咗3日，情況都係冇改善，好艱難先喺上午11點瞓着，瞓得3個鐘就被人叫醒去綵排，到晚上7點半就正式開騷，有指佢喺化妝set頭時，都係呈現昏睡狀態。

老蕭喺台上自爆：「眼睛霧霧的感覺有眼淚要飆出，但不是感動的眼淚，是時差的眼淚。」又搞笑話唔知自己喺邊、唱咗啲乜，自覺對觀眾唔公平，又話自己狀態唔係咁理想，所以先有呢個「封咪」念頭，又同經理人公司要求，未來唔再喺美加等地開騷。

而老蕭另一唔習慣，相信係因為佢要離家兩星期，要離別家中寵物，搞到佢要玩視訊嚟解思念之苦。

精選娛聞，喺晒《娛果》
http://fb.com/appledailyent