油塘政府宿舍油美苑居民郭小姐向本報投訴稱，她七月時光顧位於土瓜灣馬頭圍道的羅馬設計有限公司，訂做主人房及客廳多件家具，包括睡床、電視地櫃、梳化、衣櫃等，共繳付定金一萬七千元，預計於上月中遷入新居。
她指設計公司說草圖於八月二十六日畫好後，便可製造家具，可是卻因設計公司屢次失誤，令她入伙後一肚氣。
「設計公司話廿六號畫晒圖就可以做嘢，點知到嗰日都重未畫好，由於我哋一早定咗喺九月中入伙，所以我不斷催佢哋，但係佢哋依然歎慢板，終於要去到八月三十一號，啲圖先至畫好晒，佢哋當時實牙實齒咁講，會喺九月十五號之前起貨，重話會特別處理，一定做得切，又喺張單上面寫明送貨日期，我咪同公司攞咗假，嗰段期間喺屋企等收家具。」

可是郭小姐稱，上月十五日，設計公司並未有依照單據所列日期送貨，並聲稱二十日才能送到，她只能無奈接受；二十日她在家等候，可是設計公司再一次拖延，並保證兩日後一定可送貨，她再一次啞忍；豈料於二十二日，她等候至晚上七時，設計公司竟通知她當日來不到。
「佢哋點可以咁唔負責任，一拖再拖，我放完假佢都未送貨，我哋搬入嚟已經成個禮拜，屋企家具都唔多一件，連床都冇得瞓，要鋪張床褥瞓地，好唔方便；我好嬲，叫佢哋一定要送貨，結果當晚半夜先至送咗其中三個櫃嚟，但係就錯漏百出，衣櫃背板冇開電掣位、電視地櫃尺寸又唔啱，真係好激氣。」
郭小姐稱，設計公司最後承諾於九月三十日必定送齊所有家具，否則所有定金原銀退還，但此段期間，已令她不勝其煩，備受困擾。

羅馬設計公司負責人黃小姐回覆本報查詢稱，由於在此段時間，負責製造家具的中國內地廠房工作緊張，再加上部份家具曾遺漏運送，始出現延誤；就有關事故，設計公司已與郭小姐達成協議，少收一千元，並承諾於上月三十日將所有家具送予郭小姐，有問題家具亦會盡快修妥送回。
郭小姐事後稱，設計公司於上月三十日始終未能送貨，家具包括睡床，要在本月一日才送到。
（一○○四○○一）

服務熱線
電話：29908288
傳真：23702192
電郵：[email protected]