由韓國金牌導演羅䁐錫製作嘅tvN綜藝節目《尹食堂》，自3月播出以來一直深受韓國觀眾歡迎，節目收視最高達14.141%，成績非常理想。節目由尹汝貞、李瑞鎮、鄭有美及申久出演，佢哋去到印尼峇里島附近嘅小島上開設韓式餐廳，由於初初開張冇乜遊客，所以佢哋就要諗計仔招攬遊客，同時每早去市集準備食材，尹汝貞就做大廚，炮製韓式美食。

《尹食堂》出街後贏盡口碑同收視，亦籌備開拍第二季，不過好節目就自然引人注意，早前大陸嘅湖南衛視就宣佈會推出新綜藝節目《中餐廳》，同樣係派出藝人到海外開設中式餐廳，唔少網民一得知消息即炮轟湖南衛視涉嫌抄襲《尹食堂》，就連羅䁐錫受訪時都坦言如果《中餐廳》真係同《尹食堂》一樣嘅話，佢嘅心情都會受到影響，同時又自嘲《尹食堂》嘅版權費都唔算好貴。

而日前《中餐廳》終於確定出演名單，當中有一線明星趙薇、黃曉明、周冬雨、張亮及靳夢佳助陣，節目將於下月22號首播，現時節目組就於希臘、瑞士等地方選擇適當嘅地點進行拍攝，並調整菜單菜色，同時也展現主持藝人放鬆自我、充電與休息的一面。今日韓媒亦有報道有關新聞，並指《中餐廳》涉嫌抄襲《尹食堂》，更以「剽竊疑惑」、「強行製作」等字眼來形容，又指大陸版邀請top star出演。

韓國網民對於大陸電視台再次公然抄襲韓國節目都紛紛留言話炮轟大陸電視台嘅做法，留言：「人口咁多，居然冇人肯動動腦筋」、「我們國家係傻子？日日都被抄襲」等。