一個藝員最想擁有嘅，可能係一個觀眾永遠記得嘅經典角色，當𠵱家已經變身西貢區議員嘅方國珊，依舊被市民稱呼做「哪吒」，可以想像呢個角色當時幾咁受歡迎。但查實哪吒嘅銀色旅途，只係3年多啲，之後就負笈海外增值。
50歲嘅方國珊細個係小飛魚，中一已經係基督教青年會嘅泳隊成員，中學亦係校隊，喺校際水運會游出成績，初中攞過全場四式亞軍。佢話當年操練都幾辛苦，試過游游吓伸個頭出嚟休息，「教練會用天蠶腳踩番你落去，唔畀你偷懶」。除咗運動，佢亦有音樂細胞，學校銀樂團中負責吹喇叭，仲要學埋國畫，讀書成績就一般。

爭啲做《勁歌金曲》主持

讀過威靈頓英文中學，之後轉去新法；中六時畀星探發現，廣告試鏡成功兼獲邀到亞視藝員訓練班，3個月未夠就做咗兒童節目主持。演咗3年戲覺得自己有所不足，決定負笈海外增值，請辭時卻有波折，「當時都買埋機票，點知公司話開戲，搵我做哪吒，難得擔正做主角喎，所以應承咗」。
佢當年照坐飛機去夏威夷，視察環境兼瞓喺海灘刨劇本，之後返港拍完《哪吒》等先正式告別螢幕，到夏威夷大學攻讀工商管理學士。原來佢當年去過無綫應徵《勁歌金曲》主持兼得咗，卻因為同亞視有約錯失入大台機會。佢笑笑口話好多嘢都係睇緣份，可能包括佢四度出戰但都擦身而過嘅新界東議席。