每逢年初二，一家人必定相聚享用豐盛的開年飯。過去一年市道興旺，開年飯當然唔慳得，有齊鮑參翅肚以示豪氣。你可能會話鮑魚例必扒菜膽、魚翅必定配濃湯，了無新意，有此想法可謂大錯特錯，鮑魚可以做元寶、遼參變酥皮卷、魚翅扮麵用嚟炒……平凡中加添貴氣，這才是豪氣的表現。

記者：區佩嫦
攝影：王文忠、林栢鈞
Model：Ericko@StageModel

鮑魚　矜貴撈得起

一講豪氣，個個都話食鮑魚，鋸三頭鮑魚當然矜貴，我卻認為無甚新鮮感。潮流興玩fusion，將三頭鮑魚炮製成沙律卷，啱晒不甘平凡的年輕人；做生意嘅，鮑魚撈起便最啱，用料矜貴又有意頭。

玉簪鮑魚$68/f

用金華火腿、老雞、排骨等扣足10個鐘的澳洲三頭鮑魚，切片後穿上蘆笋、甘笋條，入口煙韌。

風生水起/i（設於$8,888迎春宴內）

食意頭的鮑魚撈起屬冷盤，大廚用較濃味的南非鮑魚仔，食時將碎燕、海蜇、蜜瓜、哈密瓜、油條和甜琥珀合桃撈勻即可。

花膠筒燕窩六頭鮑魚$128/f

六頭花膠公、六頭澳洲鮑及八錢印尼燕窩，用料靚份量足，係講豪嘅不二之選。

脆皮香芒沙律鮑片$148/f

芒果海鮮沙律卷，澳洲三頭鮑魚扣後切片，與芒果、沙律醬等以威化紙包後炸香。

如意吉祥$388/g

意大利雲吞變成中式金元寶，內含車輪鮑粒、海參及有機雜菜，蘸上鴨肉和海鮮醬汁，提升鮮味。

海參　包酥皮玩Fusion

被譽為「大海之珍」的海參，膠質豐富、脂肪低、營養價值高，不過，其滑嘟嘟口感卻未必人人接受。新派菜式將海參變成配角，釀入口感豐富的蝦膠，甚至包上酥皮及風亁火腿，大玩fusion博好感。

紅燒遼參$118/j

足6吋長的大遼參拖油後，以京葱上湯爆香，再用糖醬油等煨足20分鐘，腍滑又夠味！

花團錦簇$138/h

遼參以豆瓣醬、老雞等扣至入味，捲上黑豚肉、風亁火腿、菜及酥皮，配蘋果及意大利風亁火腿，口感新鮮。

寶珠結連心$180/i

在開邊的遼參上釀入兩顆由蝦膠製成的大珍珠，珠面綴以蟹黃及蛋白，伴以本菇，爽口腍滑兼備。

亁燒遼參$200/a

傳統四川上菜，用日本關東遼參，以豆瓣醬、雞湯等燜，海參肉厚爽口，味道香濃微辣。

魚翅　當麵炒更香

每逢喜慶場合，怎可缺少魚翅呢？魚翅撈飯當然矜貴，但用魚翅當麵炒，或是用來扒豆腐絕對是近年的新興食法，原來魚翅無湯相伴，一樣魅力非凡。

魚翅肆式薈$398/c

齊集魚翅百花球、鮮蟹肉桂花翅、紅燒大鮑翅及濃雞湯大鮑翅，用白青片翅，讓人品嚐一濃一淡的魚翅湯，彈牙的炒翅和黏滿魚翅的蒸蝦膠。

古法炒桂花魚翅$368/d

用足4両20吋長的牙揀翅，炒時配上蟹肉、金華火腿、笋絲、蛋、上湯等同炒，口感爽滑。

魚翅扒豆腐$198/e

炸香豆腐上扒滿青片翅，如滿瀉的荷包。大廚用幼滑布包豆腐，加金華火腿及蝦子，口感豐富。

喜氣洋洋發大財$338/g

腐皮卷內加入魚翅、竹笙、髮菜、蠔豉等，咬開脆皮外層，一梳梳魚翅清晰可見。

花膠　滑不溜口

花膠近年成為海味的新寵，售價正不斷飆升。一直以來滋陰養血的花膠以燉湯為主，花膠湯當然美味無比，腍滑的花膠用來燜，味道可口，口感滑溜。

黃金萬両$338/g

外貌如鳳尾蝦，加入花膠及有機野米的蝦膠包着原隻鮮蝦，外脆內軟，蘸上甜酸汁更能醒胃。

鮮奶燉花膠$68/e

花膠汆水後，用鮮奶燉足3個鐘，花膠入口腍滑，加上酥香奶味，令人一吃傾心。

花膠燜雞$180/k

一打開煲仔蓋後，酒香的雞味一湧而出，且雞肉嫩滑惹味，花膠筒亦同樣吸盡蠔油、雞肉的鮮味。

花膠爵士湯$108/f

從前有位爵士飲過蜜瓜、豬𦟌等熬成的湯後，一飲傾心，是以生果湯又稱為爵士湯。這道湯用廣肚公，配蜜瓜、皺皮瓜、螺肉、豬𦟌等熬足4個鐘，味道濃郁。

黃燜花膠海參$328/b

用發足3日的白花膠及墨西哥海參，上碟前加入鮑汁等調味料燴至入味，味道鹹中帶甜。

開年飯要講豪

Cecila：最鍾意食花膠，入口夠滑，食得多皮膚都靚啲！

Celia：今年經濟好咗，最想魚翅撈飯，夠豪氣！

Kelvin：今年搵到錢，豪氣啲鋸鮑魚啦。

（a）雲陽閣（23750800）
地址：尖沙嘴美麗華商場4樓

（b）洞庭樓（25069288）
地址：銅鑼灣時代廣場13樓1302店

（c）明閣（35523300）
地址：旺角朗豪酒店6樓

（d）怡翠軒（25245098）
地址：中環怡和大廈地下低層5號舖

（e）帝都軒/潮都軒（26943939）
地址：沙田帝都酒店2樓

（f）富豪軒（21321012）
地址：沙田麗豪酒店2樓

（g）Munch（23177887）
地址：尖沙嘴諾士佛台1號1樓

（h）亮明居（23933933）
地址：中環國金商場3樓3101店

（i）國金軒（23933933）
地址：中環國金商場3樓3101店

（j）嚼江南（26280299）
地址：荃灣青山公路388號中國染廠大廈地下G05

（k）鴻星（26280318）
地址：荃灣青山公路388號中國染廠大廈地下G02