【李八方online】被指爆粗邵家輝自稱無辜 ：只係將「點解你」讀快咗
蘋果日報 2019/12/04 16:05
電子煙李八方ONLINE邵家輝加熱煙
政府舊年提出全面禁止電子煙及加熱煙後，引發煙草業界、報販強烈反對，自由黨議員邵家輝前日更喺立法會委員會內，不滿政府選擇性解讀美國食品藥物管理局（FDA）研究報告，一度向衞生署控煙酒辦公室主管封螢疑似爆粗指：「X你，你點解讀啲又唔讀啲嘅呢？你（淨係）讀啲對你啱嘅嘢，你真係好奇怪！」
「爆粗」新聞廣泛見報兩日後，邵家輝今日就話，自己相當無辜，強調當日純粹一時「𦧲脷」，將「點解你」3個字講得快咗，點知大家一聽，就覺得似粗口「X你」喎！唔知巿民有無興趣試一試，下次見到高官時極速講句「點解你」？
似乎邵家輝對於被指爆粗好上心，佢喺舉行帳委會記者會後第二度澄清，更多次向記者示範「點解你」三隻字會變咗「X你」，其間民主黨林卓廷揶揄邵家輝「一X成名」，仲試吓讀出「點解你」，真係聽唔出會變咗做「X你」，唯獨邵家輝有此「功力」，邵仲話經一事長一智，以後要小心運用「點解你」。路過嘅會計界議員梁繼昌都有為邵家輝平反，話好少聽到對方講粗口，阿廷就話，「公開」場合係冇聽過嘅，私下就唔透露啦。
《蘋果》製圖