國家真係好睇香港,屍爬自由行,借完楊利偉,連滿天神佛都出埋,今次由一啲親中傳媒出面,請到一截佛指,嚟到特區擺設。
佛指指路賣地滿堂紅
講到呢截嘢就真係巴閉,係佛祖釋迦牟尼生前嘅靈體,流傳二千幾年,藏於陝西法門寺。有一段日子埋藏地下,「文革」時代有班紅衞兵走去破壞,點知一名老僧,挺身自焚護靈體,嚇走咗班紅衞兵,佛指得以保留。
為隆重其事,今次有一大班護僧、住持,勁大陣仗,舞龍舞獅,高宣佛號,準備恭請佛指,請呢截金手指指明吓方向,睇吓下一步應該點行。
果然香港噚日當堂轉咗地運,賣地賣個滿堂紅。
之不過,佛教最反對一樣嘢,叫做「偶像崇拜」。佛祖生前話,身體器官,只係一具臭皮囊,毫無意義。人人都可成佛,既無所謂偶像,亦冇所謂佛指、佛牙、佛腳趾、佛毛,當正好似法國名畫咁,價值四五十億,包機嚟香港展出,咁樣做,有違佛經教義,佛祖有知,可能佛都有火。