近年免費台嘅劇集都好弱勢，成日被收費台嘅劇集搶晒風頭，好似近日JTBC嘅《天空城堡》、tvN嘅《男朋友》都大受觀眾歡迎，不過SBS近日總算為免費台爭一口氣，由張娜拉、崔振赫及申成祿等主演嘅SBS劇集《皇后的品格》近期人氣急升，上周四播嘅第23及第24集，收視更升至15.1%及17.9%，暫時成為今年韓國三大免費電視台嘅最高收視迷你劇集。

而大後日《皇后的品格》就會播出第25集及第26集，承接之前一集結尾，皇室警衛隊長崔振赫抱住皇后張娜拉，而呢幕「30秒突發擁抱」仲被皇帝申成祿見到，睇嚟張娜拉同崔振赫將會感情升溫，至於呢幕「30秒突發擁抱」仲成為網民熱烈討論話題。劇迷都好期待睇張娜拉同崔振赫聯手合作，一齊去尋找殺害太皇太后嘅秘密。

事實上劇集開播以來都不時成為網民熱烈討論對象，事關《皇后的品格》有唔少劇情都好唔合理，好似話崔振赫原本係一名醜樣嘅肥仔，為咗報復就突然變成又靚仔身形又弗爆嘅崔振赫，同時劇中有好多情節都講唔通，雖然有唔少劇迷都批評劇情老土，但你有你鬧，劇集收視卻越鬧越高。

另外，喺《皇后的品格》中嘅大奸角李伊利雅因為劇集帶挈而成功上位，喺今日播出嘅《Running Man》中，李伊利雅仲驚喜現身節目，話說當日《RM》拍攝時，咁啱遇到李伊利雅正在附近拍攝，即時被節目組拉埋一齊玩遊戲。

精選韓流，喺晒《娛果》
http://fb.com/appledailyent