ViuTV大型選秀節目《Good Night Show 全民造星》有99位男性參加，今日大會安排參賽者同評判、導師、傳媒見面，包括劉美君、余安安、卓韻芝、郭偉亮、火火等。99位參賽者中會揀50位晉身決賽，期後出線選手可到美國習訓，終極勝出者可獲得100萬港元獎金。

劉美君做導師，首次和參賽者見面，佢話：「最著重將佢哋天生條件同潛質放大，但因為第一日見佢哋，自己都一舊雲，未有心水，但睇落似乎都算順眼。」余安安則擔任評判，佢嘅準則係：「我主要係選偶像，第一條件以外型行先，第二係潛質，要睇佢係咪可造之才，仲要有星味、身材、觀眾緣、要個樣唔好黑人憎，講嘢串得濟亦都唔得，不過要喺99位裏面揀50位係有啲困難，相信唔會50位都合符以上要求，可能有啲好出色，有啲係陪襯下，要再睇清楚。」余安安係演藝人協會秘書長，都有關心綠葉演員吳博君 患上漸凍人症，受到演藝人協會幫助解困，余安安話：「噚日先喺北京返嚟香港，會跟進下了解先，如果有需要必定會幫忙。」

另外有五位人候選者，網上人氣爆燈直入50強，當中74號何啟華、85號羅啟聰、曾經演過電影《狂舞派》嘅34號楊樂文，都有幕前經驗。至於歌手出身嘅羅啟聰，同何啟華曾經係「學舌鳥成員」扮劉德華成名，羅啟聰仲係許靖韻前度男友。
三位都覺得今次嘅比賽係一個大挑戰，但係如何做到評判要求，又要靚仔，又有觀眾緣，又要身型好？何啟華話：「會盡量呃自己去演一個靚仔，有機會都會表演下驚人歌藝。」何啟華同楊樂文本身係好朋友，佢哋有共識三十歲前參加比賽 ，今次目標希望一齊去美國已經當贏咗，攞100萬獎金是其次。