世盃決賽周就快殺埋身，法國國家隊教練迪甘斯禮拜四公佈咗23人大軍名單，保羅普巴、洛里斯同埋基沙文等都順利上榜，惟曼聯翼鋒安東尼馬迪爾同埋阿仙奴前鋒拿卡錫迪嘅大名，只係出現喺11位候補球員名單之上。
一般相信，曼聯中場保羅普巴、熱刺門將同埋國家隊隊長洛里斯，以至日前喺歐霸盃決賽梅開二度嘅基沙文，都會係「高盧雄雞」嘅三線核心球員。至於擁有18頂國際賽喼帽嘅安東尼馬迪爾，好大可能只會喺首選鋒線球員退隊嘅情況下，先有機會去到俄羅斯，而拿卡錫迪嘅處境都係一樣。另一方面，喺歐霸盃決賽受傷嘅馬賽中場皮耶未有入選。

日本初選香川有份

至於葡國嘅人選亦非常正路，繼續係由隊長基斯坦奴朗拿度領軍，34歲老將哥利斯馬亦入選，而跟住史雲斯降班嘅前金童連拿度辛捷士就一如外界所料落選。另外，日本亦喺禮拜五公佈咗27人初選名單，大牌球星好似多蒙特中場香川真司同埋墨超帕丘卡中場本田圭佑都有入選，不過新星伊藤達哉同埋堂安律就落選，教練西野朗都幾保守。