民主黨立法會議員林卓廷喺上月中去到英國，舉報前特首梁振英收取澳洲公司UGL 5000萬元涉嫌貪污，英國相關機構回覆林卓廷話會檢視相關資料，研究案件係咪屬於英國司法管轄區嘅範圍。但原來阿廷呢程英國之旅，仲有另一個意外收穫，就係喺當地以200幾蚊港紙，買咗一個超平嘅德國大鋼煲，「鋼水好足，忍唔到手搬返香港。」

阿廷曾經親自下廚，炆牛腩比記者食，食到大家讚不絕口，呢次佢就用佢呢個大鋼煲，再次炆牛腩帶返教會賀聖誕：「林家牛腩終於可加倍份量，總共十幾斤蘿蔔牛根腩，勉強夠近百弟兄姐妹試試口味。」

佢仲興致勃勃咁同老婆及呢煲牛腩影相，沾沾自喜喺Facebook話呀，「呢啲粗重嘢，當然係我搞啦」，指牛腩係由佢下廚，老婆只係負責影相同剪綵。