鄭伊健53歲生日大晒 叫蒙嘉慧做肥婆
蘋果日報 2020/10/05 15:12
蒙嘉慧鄭伊健
喺咩情況之下，叫老婆做肥婆係唔會出事？相信大家都會話，冇呢件事，因為一叫就一定會嬲。但鄭伊健同蒙嘉慧呢對夫妻，就話你知咩情況叫老婆做肥婆係唔會出事。
噚日係伊健嘅53歲生日，兩公婆一向都好少喺社交平台出po，但噚日罕有地蒙嘉慧就貼咗食物po，佢話：「食緊早餐，又諗食唔食埋鮮油奶多之際⋯⋯我：『老公，如果我第時變咗做肥婆呢⋯⋯』未講完，佢：『唔係第時，已經係。』你叻，一年入面你係有一日可以咁講嘢。」果然係生日大晒，叫老婆做肥婆都冇事。
網民睇到後都有向伊健講生日快樂，有網民更讚伊健係真男人，更有留言叫佢哋快啲出山，大家都好掛住佢哋。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！