當年今日
關於我們

【老公郭可頌詐型】真空露背長裙開到落肚臍 熊黛林封胸兩年

蘋果日報 2017/07/07 17:29

熊黛林郭可頌極低胸大露背

熊黛林(Lynn)、林嘉綺同Danielle Graham今日喺澳門美高梅酒店出席護膚品牌Baszicare新店開幕活動,Lynn同嘉綺兩位人妻大鬥性感,嘉綺一襲超低胸裙晒3吋事業線,而Lynn就極低胸兼大露背,搶盡風頭。
Lynn直認畀老公郭可頌詐型,所以決定今年封胸,佢話:「有試過畀佢睇,佢都有問咁性感得唔得㗎?我覺得呢條裙咁靚唔着好嘥,佢會覺得我蝕底晒,佢好傳統保守,不過佢都佢知老婆係健康性感,我會開導佢,每次都要畀佢批准。今年quota已經用晒,下年或後年都唔會咁性感。」而為咗o氹奶奶,Lynn平時都盡量少着性感。
另外,分別有1歲同4歲囡囡嘅嘉綺,為保持體態,keep住1星期3日運動,問到有冇計劃再生,嘉綺話:「可以,不計劃、不排斥、不強求,大女有跟我說想要小弟弟,我跟她說如果再生妹妹怎樣?她答我也好,可以幫我帶。老公對性別沒有關係,只希望我們健康,因第二胎有妊娠糖尿,都很擔心,希望兩個便夠,身體重要。」問到佢有咩生仔秘訣,嘉綺就笑話:「要將身體活化,保持運動,去旅行保持輕鬆心情,還要醉酒。」問佢係咪成日畀老公灌醉?佢就話:「最近戒酒了,怕突然懷孕。」佢仲勸Lynn順其自然,要享受二人世界。
最後問到Lynn會唔會試吓用灌醉呢招生BB?Lynn就話怕老公醉咗瞓天光,所以下次試吓灌醉自己,佢仲好有憧憬咁話:「o依家係好甜蜜,但有BB就係另一種幸福。」