ViuTV開台收視不斷報喜，近日都密密有製作，佢哋嘅重頭劇《瑪嘉烈與大衛系列綠豆》今日下午四點左右喺銅鑼灣嘅利園山道拍攝外景，周家怡同湯怡「雙怡」出動，佢哋着得甚似OL喺度拍街景，換上一身春裝，劇情講佢哋行街，周家怡就一邊行一邊講電話，仲突然講個byebye就衝出馬路，風飄飄吹起周家怡件外套，身材盡顯。

唔好睇個劇情好似好簡單，但佢哋製作都好認真，每次拍完周家怡同湯怡就好主動走埋去同導演睇PlayBack，更加主動要求拍多個Take，最終有個Shot拍咗三次先收貨，大家就可以安心收工喇！之後《蘋果》打畀周家怡，佢話今日拍呢場係放工戲：「講我哋放咗工，準備去唱K。」