馮仁昭四圍超：續約換紅館騷
衞蘭反口撇黎明 - 馮仁昭

蘋果日報 2014/10/02 00:00

由黎明一手栽培、下個月喺紅館開演唱會嘅衞蘭（Janice），近日接受雜誌訪問突然自爆明年約滿A Music會離開，仲講明未正式同黎明講。馮仁昭收到風，唱片公司為咗呢件事好嬲，因為年初衞蘭口口聲聲話會續約先幫佢開演唱會，點知佢突然反口，𠵱家唔知點同黎明交代。
empty
衞蘭單方面宣佈明年約滿黎明（小圖）嘅A Music唔續約，激嬲唱片公司。資料圖片
應昌佑已離開
馮仁昭又收到風，除咗衞蘭事先聲明唔會留低，同佢同期出道嘅應昌佑，原來已經喺上個月約滿離巢，有人再爆料話：「JW約滿一定會走，因為佢早就對公司唔滿意，覺得唱片公司同經理人都幫唔到佢，而李治廷𠵱家拍住緋聞女友范冰冰搵食，就更加唔在乎香港呢個市場啦！」
爆料者仲話，A Music留唔住啲歌手，其中一個原因係佢哋簽A Music，一定要簽埋黎明所屬嘅經理人公司，但公司偏偏就幫唔到佢哋接job，好多工作都係靠自己朋友介紹搵番嚟，大家都覺得長遠唔係辦法，惟有離開再搵出路。馮仁昭噚日打過電話畀A Music高層王凱文，但佢就一直冇接電話。
撰文：馮仁昭
empty
應昌佑剛拍完電影《我們停戰吧！》，據知佢正計劃轉行，脫離娛樂圈。