「選美係一種好唔同嘅intern，而你睇嘅嘢一定多過你去入某大公司、某大銀行、某大機構做嗰三個月囉。」翁嘉穗喺20年前、1997年，喺加拿大溫哥華啱啱大學畢業，就去參加香港小姐：「嗰時TVB會去海外揀一啲唔同嘅女仔參賽，咁何麗全同埋Rosa(陳紫蓮)就揀咗我，當時送埋來回機票，同埋即入20名喎，咁我試吓囉，如果唔鍾意或者唔得咁，我又可以做其他嘢。」

翁嘉穗之後勇奪冠軍而入行，履行港姐一年的使命後，並冇跟同屆嘅季軍佘詩曼一樣，選擇留喺娛圈發展，佢話：「當選後有一年喺娛樂圈，我覺得幾新鮮，但唔係好習慣。」

離開娛圈，翁嘉穗喺99年同鄔友正結婚，做個幸福少奶奶，成為人生勝利組：「當時梗係諗住會有啲事業，做啲其他嘢，但係緣份到咪結婚囉，結婚又唔代表你無晒自己嘛。」結婚咁多年，佢認為兩夫妻相處最重要識得互相遷就、忍讓同尊重。婚後先後隔十幾年誕下兩個兒子，她笑說：「開頭係想隔一隔先，想全心全意照顧一個，隔好近會好辛苦，但我都冇諗過隔咁耐。」咁點相處？「我大仔15歲，佢細個覺得我好嚴嘅，o依家就覺得我都會同佢溝通、同埋鼓勵佢嘅媽咪。我比較重視禮貌、尊敬人，佢哋德育個方面，即係你第日出到社會，待人處事，呢啲好重要，係一個基礎，所以我會俾佢哋讀傳統學校先，跟住中學就轉去國際學校。」

大仔喺運動方面有好好成績，最近仲破咗香港3項舉重紀錄。咁喺o依家呢個學習環境，又要唔要兩歲嘅細仔Kaspar讀好多course？翁嘉穗話：「有報，其實咁細個我覺得畀比佢有一個好嘅development，例如腦部、sense等，呢個時間你唔會要佢識好多書。但係我再同外國啲朋友傾，原來佢地三個月大嘅BB就要去上班，我初頭以為係daycare，佢哋話係上堂o架！咁歐洲都係咁樣，可能係一個教育全球趨勢囉！」翁嘉穗覺得自己唔係虎媽、怪獸家長。

20年嚟，翁嘉穗覺得由返香港一刻，已經係完全唔同嘅世界：「做媽咪或者跟先生做生意，接觸唔同嘅人、經歷唔同嘅事，甜酸苦辣都有試到，但係幾滿足嘅。」拍攝當日見到佢個「Baby」：「例如呢間舖頭嘅設計，你見到啲嘢，入咩貨等，全部都係我自己揀嘅，仲有個brand嗰個image，生意額，或者定點樣宣傳我都會involve。」

不過翁嘉穗最開心就係見住兩個囝囝出世：「好開心嘅真係，我諗最感動係出世個吓，因為喺個肚好耐唔知點樣，真係見到佢哋喇，就覺得幾辛苦都係值得！」

採訪：黃曉妍、懷鈺
攝錄：馮峰、Neo
攝影：沈健程
場地：香港仔軒琴居
手錶及珠寶：Piaget