吳鎮宇、袁詠儀（阿靚）、張達明、吳肇軒同導演邱禮濤等今日喺廣州出席電影《家和萬事驚》發佈會，大會仲為缺席嘅古天樂做咗個人形紙板，喺台上一齊影大合照。

張達明喺台上話，多謝鎮宇令佢嘅舞台劇變成電影都靠吳鎮宇：「佢睇咗我個劇本話得呀，仲問我係咪做男主角，我話預咗佢㗎喇，佢就叫我做埋佢老竇啦。」鄭欣宜、苑瓊丹、麥長青、泰臣、楊玉梅同胡楓等仲拍片支持張達明，令佢好感動：「我仲要多謝鎮宇幫咗我好多，佢介紹咗好多人畀我識，啱啱仲介紹咗發哥（周潤發）畀我，帶我跑步，令我身體健康咗好多。」

司儀要佢哋互相講對方嘅煩惱，阿靚笑指吳鎮宇最煩就係太靚仔，吳鎮宇即反擊話：「佢有講過佢嘅住屋問題㗎，佢話由睡房去沖涼都差啲要搭的士。」阿靚搞笑話：「咩截的士呀？我屋企用golf car㗎。」之後玩遊戲嗰陣，吳鎮宇又整蠱阿靚，表現好鬼馬。吳鎮宇同阿靚合照嗰陣，兩人又鬥擺可愛甫士，又扮花又做港女十式，相當抵死。問到佢哋好耐冇合作，阿靚話：「之前鎮宇同我老公（張智霖）合作多啲，我咪成日去探班囉。」鎮宇接住話：「係呀，佢成日話去探老公班，其實黎睇我。」阿靚仲話拍呢部戲可以唔修身：「咁我做師奶㗎嘛，唔使特登減肥。」

講到張達明喺台上多謝吳鎮宇拉線，吳鎮宇話：「呢個劇本我睇咗10年㗎喇，又舞台劇錄影帶，又有書，我覺得呢個題材係永恆嘅。自己覺得好少呢啲劇本，所以要拍下。」

農曆新年將至，佢哋就話可以放幾日假，阿靚透露會出埠，不過就唔肯講去邊：「已經好多人，費事講完再多啲人。」吳鎮宇話有部戲可能要跨年，所以放假爭取時間休息。阿靚笑問佢新年開工會唔會有雙糧？吳鎮宇就好抵死咁話：「我哋支持香港電影圈，一定要三工。喺大陸拍戲，啲人唔明點解節日會有雙工、三工，反而我哋香港仲重視呢啲日子。」

導演邱禮濤話第一次睇呢個劇本已經係20年前：「當時都有搵過投資方，但就係差啲嘢。大家都知達明之前唔舒服，到佢可以行動返之後，佢就搵我想搞電影。呢個大主題係房屋問題，我睇到香港同大陸都有呢個問題，加上我之前話要拍呢個劇本，所以就改編咗開拍。」另外，提到電影《新喜劇之王》係由邱禮濤導演，但早前公佈嘅trailer就標明係「周星馳導演作品」，邱禮濤話：「我同佢合作得好愉快，不過我一年拍咁多戲，唔可以喺甲公司，做乙公司嘅嘢，呢個係操守，所以我哋唔好講第二啲公司嘅嘢喇。」

精選娛聞，喺晒《娛果》
http://fb.com/appledailyent