電鬚刨款式多多，點揀應視乎面形及個人習慣。一般三環設計接觸面夠大，剃鬚慳時間啱晒心急人。三把獨立剃刀為浮動設計，能緊貼面部曲線走，刁鑽位亦無走雞，特別適合面形輪廓較尖削複雜人士。個人就歡喜佢好似下下大大力向下壓，剃得深又乾淨。

飛利浦新出PowerTouch速．感Pro強玩三刀頭SmartPivot智巧三重浮動系統，DualPrecision圓孔及狹縫雙刀網刀頭兩者夾擊，可剃除不規則方向和長短不一鬍鬚；內置環保長效鋰電池，叉電與用電時間一比一，叉一小時就可無線使用六十分鐘，仲有三分鐘快叉，夠剃一次鬚。可水洗。

PHILIPS最頂級之作，一般浮動刀頭只可呈品字形向內凹入，佢就多咗個向外翻開功能，令貼面程度大大提升！

往復式刀頭保護膜較薄，面有肉地剃起嚟會感覺貼面啲好Feel啲。以往為人詬病係要用塊面遷就刀頭嚟剃，不過高檔機好多已加入浮動刀頭，可解決此問題。不過，仍舊唔適合大力按壓，否則易令刀身及薄膜磨損。

三刀兼日本製造！摩打去到每分鐘振動13,000次，亦非一般旋轉式刀頭做到，可水洗，仲有音波震動清洗功能，極乾淨。

呢部係好多西裝友見客利器！薄到只有12mm，袋喺身只係等於多咗個卡片盒，玩浮動單刀頭配兩粒2A電，一切以方便為原則。

須知鬚刨內有鬚根、死皮及油脂等，好易有細菌，用後宜立即清洗。如果部機係水洗設計，可用少少消毒梘液滴於刀身之上，然後閂蓋、開着佢，最後過清水就可洗得徹底。

新款剃刀多採用多重刀鋒設計，好處是大面積位置剃得份外乾淨；不過相對一些複雜部位，落刀時會有種頂住頂住感覺。GilletteFusionPower就特別在刀片背加多一塊刮刀，方便一些難入位。$65/c

Gillette「傳說中」的Sensor是早期的產物！「傳說」何解？有人用了超過十年仍然用緊，超好用襟用，可惜手柄長期缺貨！但超市仍可買到刀片，好處係刀片薄易剃刁鑽位，價錢平，唔使動輒近百元買三五塊刀片，無咁揦脷囉。10片裝刀片$50/c

更平方案係即棄刀片，舒適呢隻係當中較鋒利一款，用起嚟有啲技術含量。幾蚊支，一般藥房搵到。

一眾女士留意，呢段說話係對你哋講嘅！刀片掉落洗臉盆，切勿順手放返入鏡櫃，因為刀位一個小崩口，下次你男人再用時就會馬上毀容或割傷！個人小習慣係會每次用後洗乾淨，放回刀片架入面，呢個係「歷史教訓」！

講到「濕剃」中嘅專家，一定係傳統上海理髮店，走訪五十三年歷史、荃灣最老資歷「上海國際理髮男女髮型」，老師傅話：「入行時，三年學做小師傅，再三年升大師傅，咁樣已經係師傅睇得你起！剃鬚係上海理髮中最難一項，因為要令人享受整個過程，剃完一手摸上臉，完全無一條鬚根咔手先叫正統！」咁高超嘅技術，絕對值得大家借鏡！

一般人濕剃，搽上剃鬚膏就落刀：「我哋會先薄搽一層番梘，再敷熱毛巾，可有助放鬆毛孔，軟化鬍鬚，之後再厚搽番梘先落刀。」

一般人用剃刀或鬚刨都會用力壓在臉上，然後用前臂力用力拉下，感覺剃得乾淨啲，上海師傅用刀秘訣在於只用指力，而且是幾厘米幾厘米逐小剃，令刀鋒貼合面形，亦唔怕太着力而拉傷毛囊。

鬍鬚同頭髮一樣向下生，上而下落刀是順刀，下而上是逆刀。剃鬚要順刀，逆刀剃得乾淨卻傷毛囊：「平時剃鬚唔使刮得太乾淨，否則會越剃越粗，有重要日子須特別整理儀容，逆刀亦可偶一為之。」鬍鬚剃得過短更易倒生令皮膚紅腫不適！

傳統上理髮店剃鬚後，會用薄荷膏做消毒護膚，用手擦㷫、凉凉辣辣的感覺，令人精神為之一振！同平常剃鬚後落鬚後水，兩者目的完全一致。

a.飛利浦（26199663）
b.中原（26997299）
c.百佳（26987321）