蘇麗珊今日喺中環出席新手機發佈會， 分享電話用家心得。蘇麗珊話自己係典型低頭族，尤其拍戲期間等候，成日都會用手機搞到頸梗膊痛，曾想抑壓自己，但實在又覺電話係一個好好消遣同娛樂。

除此之外拍拖同男朋友溝通都唔少得，但就好少用視像溝通報道，蘇麗珊話：「我自己覺得自己係一位幾有安全感女朋友， 做乜嘢都會同男朋友講聲，例如化緊妝佢會問我化成點，我就send張相畀佢睇 ，感覺大家知道大家做緊乜。」不過就唔特別希望男友突擊探班，會令佢分心。

現時蘇麗珊拍攝一套電影，飾演下半身癱瘓女士，全程要坐輪椅，幾乎一日坐足12個鐘，佢話：「原來唔郁好辛苦，好似比蟻咬 ，所以唔使開工就會去做運動。」講開運動之前蘇麗珊曾經上載自己做運動素顏片段上網，佢話覺得唔化妝還好，仲笑指：「朋友都有串我，問我係咪嫌IG followers太多，唔化妝有黑眼圈都好正常，嘗試下俾真面目大家睇下。」會唔會素顏出鏡拍戲佢就話：「導演ok我ok，唔驚嚇親人就得啦。不過我乜都食，皮膚狀態有時冇咁好，如果真係有呢個舉動就要調整飲食先。」

精選娛聞，喺晒《娛果》
http://fb.com/appledailyent