漢洋、譚嘉荃、裕美同潘朵拉樂團等今日喺尖沙嘴為《粵唱粵好》歌唱比賽擔任嘉賓，並推動廣東歌。裕美透露黎緊都會造廣東歌：「依家每星期都開live唱吓，男友都有聽，我仲迫佢聽我首《搭錯車》，不過佢聽唔明。」佢話嚟緊嘅新碟，可能會翻唱經典嘅廣東歌：「我媽咪以前做酒廊歌手，成日唱甄妮同譚校長（譚詠麟）嘅歌，嗰啲歌詞真係好好，到依家都百聽不厭。」

裕美仲話曾經有報名參加外國歌唱比賽《X Factor》，但因為時差嘅問題，最後就冇去面試：「但我想由小型比賽開始先，慢慢再去大型比賽。」

漢洋同譚嘉荃認為依家嘅廣東歌留得唔耐：「好多新歌出咗都唔知，反而最近《延禧攻略》嗰個明玉（姜梓新）翻唱《囍帖街》，令首歌多咗人認識，希望可以令大家留意多啲。」譚嘉荃認為媒體已經轉化咗，年青人都係上網聽歌：「但係全世界嘅歌都可以畀佢揀，又點會揀到香港嘅歌吖？就算係香港最top嘅歌手，依家plug歌都好難。」

精選娛聞，喺晒《娛果》
http://fb.com/appledailyent