大家還記得章宇昂這名字嗎？名字聽起來好似有啲陌生，但提到佢係章小蕙同父異母弟弟，可能會勾起大家回憶，加拿大長大嘅宇昂喺8年前大學畢業後便挾着章小蕙弟弟之名，毅然嚟到香港投身娛樂圈，入讀藝員訓練班，之後喺大台拍過多部電視劇，包括《衝上雲霄II》、《情逆三世緣》、《巾幗梟雄之諜血長天》、《潛行追擊》等等。

現年30歲嘅宇昂好嚮往娛樂圈嘅生活，現時主力喺大陸發展，目前正拍攝多部電影與電視劇，不過大家似乎對佢嘅背景更感興趣，宇昂卻認為呢個稱號有礙發展，佢早前喺香港接受訪問，宇昂無奈話：「我生出嚟喺呢個家庭，係冇得選擇嘅，不單係我，所有人都冇得選擇，好不幸，有啲人會話有影響，亦有人會話冇，人哋點樣諗法我控制唔到，我同佢係兩個generation嘅人，喺我心目中唔係好大嘅問題，呢方面我不嬲唔睇太重，希望導演同監製同我合作係因為我嘅演技，到o依家為止都好幸運，遇到啲真係好睇重藝術嘅人，我唯一可以做嘅係我嘅專業，只要係攝影機前做好自己就得。」

對於複雜嘅家庭背景，宇昂大讚已離世嘅爸爸處理得好，兩個家庭會分開處理，宇昂亦唔介意提及家姐章小蕙，雖然係「姊弟」，但關係疏離，宇昂話：「其實我同佢不嬲都好少來往嘅，爸爸走咗之後我哋各有各忙，相信佢都好忙，對我嚟講暫時越忙就越好，因為唔使諗太多，你冇得選擇你嘅家庭，自己做好自己吧！」宇昂直言因為呢個家庭背景，增添咗唔少壓力，佢話：「有時候都會有少少（唔開心），不過我覺得最重要係向前看，睇吓未來嘅工作，做好自己，向住自己嘅夢想、目標去做，努力係一定有回報嘅。我唔開心係因為爸爸喺我27、28歲嘅時候就走，都係細咗啲，大部份時間自己要執生。」

至於喺宇昂心目中，除咗親生媽媽係superwoman，家姐章小蕙亦係一個好強嘅女人，佢話：「She's really strong！佢係一個好強嘅女人，講真我同佢好少來往，但來往嘅時候都OK嘅。反而喺無綫做嘢嘅時候見過一次B哥（鍾鎮濤），佢好友善，嗰時我諗住同佢打咗個招呼，佢真係好好人。」不過對於家姐早年活躍香港時尚圈，宇昂就話當時仲細，好多嘢都唔會參予，不過無論點都好，宇昂都認為大家始終都一家人，就連家姐有好多負評，被冠壞女人、拜金之名，佢都話：「I don't know！我只希望自己可以結婚，我好細嘅時候就希望可以結婚，趁爸爸仲喺度，希望搵到個好好嘅女朋友，但唔係我能夠控制，o依家要睇緣份。我唔會因為屋企人嘅婚姻關係影響自己睇法，各人有各人目標，我o依家同工作拍拖，太忙嘞！」至於章小蕙再度活躍，宇昂就支持話：「我完全唔知，如果真係復出，I wish her the best！佢喺我心目中係好強嘅女人。」

章宇昂大學時修讀商業與音樂，多才多藝嘅佢小時候喜歡米高積遜（Michael Jackson），熱愛音樂，不過佢依然醉心演戲，宇昂精通英文、普通話、廣東話、法文同日語，又愛滑雪、打網球同跑步，非常活力。宇昂曾經有機會到荷李活發展，不過佢最後選擇進軍大陸，對於錯失到荷李活發展嘅機會，宇昂話：「其實之前有一個機會嘅，試咗鏡做迪士尼《花木蘭》男一，啱啱當時接咗大陸嘅電視劇《秋官課院之狄仁杰浮世傳奇》，因為我對導演嘅尊重，所以冇拍到《花木蘭》，係有啲後悔，知道甄子丹會參演，wish him the best！」

宇昂仲話：「o依家拍劇同電影為主，我有啲奇怪，鍾意有啲特點嘅角色，未必大家都接受嘅，有少少搞笑，或者唔正常嘅，富藝術性嘅角色，不過唔知點解搵我演嘅都係一啲好悲情嘅戲份，可能我個樣比較憂鬱。o依家最想嘅當然搵到一個發揮機會！每一個演員都希望可以遇到有發揮嘅角色，由頭到尾、立體嘅演出，係作為一個演員嘅夢想。」喺電影圈入面宇昂偶像多多，包括占士甸、里安納度狄卡比奧（Leonardo DiCaprio）、梁朝偉、周潤發、謝霆鋒，而佢曾經同陳小春、陳法拉合作，亦師亦友，宇昂話：「法拉就好似我姐姐咁，會教我好多嘢。而我去大陸第一部劇就係同陳小春合作，好開心，當時有同佢對戲，佢教我連皮食番薯，好健康，要多謝佢。周潤發當年同吳宇森合作嘅電影，我都好鍾意，希望有機會可以合作。」

精選娛聞，喺晒《娛果》
http://fb.com/appledailyent