實政圓桌立法會議員田北辰向來都愛向高難度挑戰，佢咁大個人幾乎未踢過波嘅佢，最近膽粗粗應承落場鬥波，「敵軍」仲要有成100人，處男下海做守門員嘅佢最終被射入兩球，戰績其實都算唔錯。

田二少辦事處最近同「関西塗料」舉辦「曼聯百人足球挑戰賽」，佢同曼聯退役名宿朴智星、維迪同布隆基斯組成「辰隊友」，而佢哋神一般嘅對手就係田二少喺全港小學邀請參戰嘅100名三至五年班嘅小學生。田二少揀人時都叫學校揀啲基本識踢下波嘅，點知間間學校都派咗最強嘅陣容出嚟。

唔係講笑，呢對百人大軍係同時上場迎戰「辰隊友」，前鋒都有成卅個，田二少開賽前叫定啲小朋友「腳下留情」，最多入1球好嘞，最終呢班足球小新星奮力應戰，好幾次田二少都要瞓身落地攬波先幸保不失，但對方強勁攻勢下最終失守兩次，比賽1：2完場。

雖然輸咗波，但田二少話見到小朋友玩得咁開心，大朋友又睇得咁開心，佢又有機會同曼聯球星踢波，都係開心事，而且有小朋友仲叫佢喺波衫簽名，佢真係受寵若驚！