【明寸山寨團】AKB大陸組隊撼SNH 中日大戰一觸即發
AKB48SNH48
AKB大陸組隊撼SNH,仲明寸山寨團,令花生指數爆直線上升。
日本組合AKB48早幾年可算威盡藝能界,唔止於日本各地組成SKE48、NMB48、HKT48、NGT48及STU48,仲有台北TPE48、馬尼拉MNL48、曼谷BNK48等,而2012年就同大陸合作成立上海姊妹團SNH48,不過上年卻爆出雙方合作出現問題,有指大陸方面未得日本同意就組成兩隊山寨組合,即時辣㷫AKB總公司,仲高調地宣佈同SNH割席,當時直指SNH單方面違反合約,但SNH就懶理聲明,死撐冇違規云云。
AKB同SNH已結束4年間嘅合作關係,大陸繼續成立北京BEJ48及廣州GNZ48。不過呢件事冇影響AKB發展大陸市場嘅決心,去年起多次派AKB成員到強國試水溫,渡邊麻友去年12月率川本紗矢、伊豆田莉奈到上海宣傳時,就引來一班愛國人士踩場,搞到大陸AKB迷同反日抗議人士引發衝突事件。
及至今日,AKB宣佈會在上海組成一隊真正官方姊妹組合,於10月17日開始接受招募,歡迎14歲至20歲少女參加報名,到時會作出甄選、面試,成功出線者可以獲AKB方面簽約成為旗下藝人,而網站首頁就有渡邊麻友肖像,旁邊仲寫上「AKB真‧來了」,擺明衝着SNH等山寨團而來,中日兩方勢再開戰,近日已有強國網民呼籲同胞們唔好再撐日貨及罷睇日劇。