徵友網頁嘅出現，除咗可以幫各位網友搵番個傾訴對象，仲間接撮合咗唔少單身男女。可能你覺得，呢樣嘢只係年輕人嘅玩意，但聽聞，某個已經離婚嘅汽車股高層，都有喺內地一個好受歡迎嘅網站度徵友！
呢位高層喺徵友網頁度，好誠實咁講明已經離婚，從事金融業。冇錯！佢的確自稱從事金融業，咁上巿公司董事應該都持有自己公司股票，又或者炒賣吓，所以都算係金融業，佢仲喺自我簡介度寫咗首情詩。來自金融界，又識得吟吓詩，可謂有文采又有錢財，但佢嘅要求又唔係好高咋噃，佢話想結識「單身、三十至四十歲、身形嬌小」嘅女士。

愛單身嬌小中女

香港人工作忙碌，連休息時間都冇，喺忙碌過後，都好希望返到屋企可以搵個人傾訴。呢位高層日理萬機，放咗工之後，都係個普通人，都會寂寞，都會凍。上網搵個人傾吓偈，亦都係一個解悶方法。
華華希望呢位高層唔單止可以搵到傾訴對象，仲可以搵到共度下半生嘅另一半啦！不過，就千祈咪學前排《壹週刊》個封面古仔主角。
好記性嘅都應該有印象，某上市公司總裁鍾意上網識女仔，本來虛擬世界談談情、說說愛，無傷大雅，但嗰位總裁趁去上海開會，順道去轉北京，同網上識到嘅「虛擬女友」嚟趟「實際溫馨」，咁都唔緊要，最衰係呢位總裁工作太忙，溫馨完就音訊全無，搞到「虛擬女友」將件事對外宣揚。
電郵：mailto:[email protected]