【尾場嘉賓】送完皮鞭再送情趣內衣 張敬軒祝陳柏宇鞭鞭有力
陳柏宇張敬軒皮鞭情趣內衣
陳柏宇(Jason)一連兩場紅館演唱會,噚晚圓滿結束,太太符曉薇撐足兩日,另外去捧場嘅嘉賓有楊千嬅同老公丁子高、林奕匡同老婆、小肥、JW,張敬軒做表演嘉賓,不過佢一早就座喺觀眾席睇騷。
唱咗大約20分鐘之後,Jason就話:「我今晚一啲都唔緊張,甩得仲勁,噚晚有8成幾嘅歌甩咗,大家可能唔知。」中段佢介紹台上一嚿叫「飛雲」嘅設置,然後話:「飛雲噚晚發燒唔舒服,燒咗個底版,今晚機會嚟啦,經過噚晚大家為佢打氣,已經好番。」Jason喺台下揀咗個女觀帶上台,坐上嚿雲上面,兩個好似情侶咁,坐住嚿雲升上半空,Jason唱到最後就話:「黐線嘅,唔係唔錫嘛。」跟住就一啖錫咗對方個後尾枕,搞到全場尖叫,老婆見到仲擰頭大笑,Jason笑話:「呢份係我打過最耐嘅工,11年,仲耐過我拍最長嗰次拖。」呢個時候,突然有fans大叫:「我愛你,愛埋你老婆。」Jason即笑住話:「你哋咁會搞到佢好大壓力,O依家佢出親街都要化妝,驚唔化妝俾傳媒影到,不過佢化唔化妝都咁靚。」
到嘉賓軒仔上台,二人合唱完後,軒仔收過Jason嘅簽名碟之後,就話都有禮物回敬,跟住拎咗條邊鞭出嚟:「我祝你鞭鞭有力,寫多啲好歌畀大家聽,不過你留意個鞭頭係心型嘅,最好就係送畀阿嫂,呢啲我就無福消受,通常做完紅館嘅歌手就會越嚟越忙,如果你哋第時抽唔到時間返屋企,等阿嫂鞭你,你到時講我知爽定唔爽吓!不過出雞都要出埋豉油。」
跟住軒仔再拎咗份禮物出嚟,係一套男人情趣內衣,Jason見到即喪笑,仲問係咪大size,軒仔好抵死咁話:「目測呢樣嘢我最叻,你o依家大個仔,係要有啲野防身。」Jason落台後,軒仔台上solo,佢再話:「呢行好多人需要去寒喧,但陳柏宇永遠係座埋一邊,可能因為呢個原因,佢將寒喧嘅時間創作咗啲好嘅歌,叱咤聽日投票,希望大家投畀佢,有投多咗嘅就投埋畀我。」
完騷之後,Jason接受訪問,開心話:「今晚好正,好享受。唱第一首歌已經開始眼濕濕,好激動,見大家不停拍手掌為我歡呼。」係咪返屋企着軒仔送嘅情趣內衣慶功?Jason正經咁話:「返去都瞓喇,晚晚夜瞓好攰。」軒仔係咪將屋企嘅收藏品送畀你?佢笑話:「我知係新嘅,可能佢睇下屋企有啲咩嘢啦,再買一set送我。軒仔一直係我尊敬嘅歌手,同學習對象,佢份優雅值得我去學習。鄭伊健就係兒時偶像,開騷前我諗最想同佢喺台上合唱作,不過同佢唔熟,只見過幾次面。」
更多娛聞,喺晒《娛果》
http://fb.com/appledailyent
陳柏宇(Jason)一連兩場紅館演唱會,噚晚圓滿結束。
軒仔上台,二人合唱完後,軒仔收過Jason嘅簽名碟之後,就話都有禮物回敬,就係一條皮鞭。