韓國人氣韓劇《雲畫的月光》無論喺韓國、香港定係大陸都有唔少劇迷支持，當中喺韓國方面收視更節節上升，根據韓國電視話題性分析機構嘅統計，喺9月份第三個星期嘅韓劇話題性排名中，《雲畫的月光》再次成為冠軍。

計埋今個星期嘅冠軍，《雲畫》已經係第三個星期奪得韓劇話題性第一名，佢以33.61%嘅成績冧莊冠軍，而排第二位就係韓版《步步驚心》(17.53%)，之後就分別係《W》(13.26%)、《嫉妒的化身》(7.45%)、《獨酒男女》(5.32%)、《灰姑娘與四騎士》(3.98%)、《Fantastic》(2.24%)、《月桂樹西裝店的紳士們》(1.84%)、《權慾叛戰》(前名：K2、1.61%)、《獄中花》(1.61%)。

同時另一個統計就由韓國Nielsen以及CJ E&M共同發佈嘅CPI話題榜，同樣《雲畫》以295.5分，成為冠軍，原本上周冠軍為韓版《步步驚心》，不過本周《步步驚心》就跌至第二位(250.4分)，而《無限挑戰》就以241.6成為第三位，上周大結局嘅《W》就以235.9分排第四位。