【安心復工】許志安戴婚戒表忠貞 提Sammi眼濕濕：佢叫我出嚟要信心
蘋果日報 2020/06/15 19:32
許志安CHILL CLUB安心復工
許志安花上14個月時間修復壞了的自己，今日到九龍灣為ViuTV節目《寶麗金50周年Chill Club》錄影，是去年自安心偷食事件後首次復工。
晚上7時許，換了西裝的安仔戴婚戒正式復工，面對傳媒時滿面笑容、精神不錯，但仍有些微緊張。他首先跟主持影合照，再影單人相。訪問時，他向大家說：「今日係寶麗金50周年special，自己好開心嚟到呢度。經過呢段時間沉澱、靜思、反省、自己學習，覺得自真係成長好多。呢段時間確實有hard time，但每次當面對自己起點喺邊度，自己都好盡力向前望，今日係一個好timing出嚟面對自己，面對群眾，面對自己，面對社會，我希望呢件事發生，令自己未來日子行得更加好，重新出發，做好自己。」
安仔續說：「喺呢段時間，自己花咗好多時間陪屋企，屋企對我好重要，我好努力咁去裝備自己，做運動、睇書，希望鍛煉番好嘅自己，亦都深深知道嚟緊日子要點行點做，我覺得今日先係時候出嚟見大家，承擔返我之前講過嘅嘢，要好好畀段時間我靜思己過，經過呢年幾，我而家裝備好，重新出發。」問到是否全面復出？他說：「其實真係唔敢講，因為而家疫情環境，真係唔到我諗，我反而着重係今日出返嚟話畀大家知，自己已經準備好，我唔敢講未來係點樣，但我好有信心，100%充滿信心去做得比以前更加好，至於遲啲復工就交畀公司。」
問到昨晚有否緊張睡得唔好？安仔說：「都有，但同自己講係咪真係ready？譬如我太太同我講，佢話你要做呢個工作，你要100% ready ，心態要好正面，要話畀人知呢年幾你嘅信心，我問自己係可以，但有啲緊張，要勇敢承擔面對。」問到Sammi有冇特別說話鼓勵？安仔說：「佢話自然啲，因為你要對自己有信心，呢段時間隨咗好好修理自己之外，因為自己我自然啲，對自己要有信心；我哋嘅狗Lucky已經15歲，呢段時間要花好多力氣去照顧佢，我喺佢身上學到珍惜。雖然佢已經進入倒數嘅日子，但我希望佢可以開心啲，唔好咁痛苦。」安仔講到太太，都有少少眼濕濕。
安心事件至今，仲有冇同黃心穎聯絡？許志安神態自若地說：「冇喇，以前嘅嘢過去咗，大家畀啲時間我，我都明白要大家接受係需要啲時間，但係我有信心每一步都做得好好，過去嘅由得佢過去，自己嘅錯誤、傷痕，我唔會忘記。當每次我見到呢啲傷痕，我都會警醒自己，提醒自己，未來要做得更好。」馬國明亦都有為許志安送上祝福，最近馬明戀情曝光可有留意？安仔表示：「我有睇到報道，但呢啲留返佢哋自己講。」
在呢段時間入面，最想感謝哪一位？安仔說：「要多謝朋友嘅鼓勵，有好多喺我心入面。仲有屋企人，當然仲有Sammi。又好似Joey Tang咁，之前邀請我出席演唱會，但係當時嘅我未ready，未有信心承擔責任，所以我婉拒咗。」之前安仔的演唱會最終取消，可有計劃再次舉辦？安仔表示：「完全未有打算，今日出嚟主要係畀信心朋友，話畀佢哋知我可以繼續向前行。」至於早前有報道指將會擔任梁漢文演唱會嘉賓，安仔說：「我冇被邀請，但係如果到時間一定支持。」
至於今日會否視為正式復出，安仔未敢肯定：「唔敢講，因為疫情關係，好多嘢都諗唔到。前排同蘇永康派口罩，探訪家庭，老人家需要愛同關心，喺過程中佢哋幫我思考人生意義。」問到是否有信心挽回事業？他說：「盡力啦，盡力做好自己，相信假以時日可以。」安仔前後接受大１約9分鐘訪問，據公關表示安仔今日將會演唱兩首歌，首先獨唱《一步一生》，然後將與Aga（江海迦）合唱《半天假》。
（採訪：曹家誠、攝影：葉君海）
左手無名指戴上結婚戒指。
靜候14個月，今日復工，面對傳媒有微笑。
大批傳媒上前圍訪。
安仔先於台上與主持人合照，似乎有點拘謹。
單人照時終於見到雙手。
返回後台仍然是眾人目光所在。
Joey Tang上前力撐老友。
安仔受訪都有透露，Joey Tang早就發出邀請，但當時仍自覺未ready，所以婉拒。