葉劉淑儀孖住史泰祖同田二少成立新民黨，好多人都問佢哋走乜嘢路線，究竟想打邊個黨，搶邊方面票源，噚日終於有眉目。
話說葉劉嘅司機，噚日下午3點幾在立法會停車場發生交通意外，首先失控撞向左邊工聯會潘珮璆架平治，慌忙扭右軚，卻揩親民建聯張學明架車，煞唔停架車，再撞到社民連黃毓民架七人車，最後kiss咗一架藍色保時捷一啖至停低。

幾架車總值逾200萬

嗱，大家唔好誤會，架藍色波子唔係有富貴黨之稱嘅自由黨議員座駕，根據車牌登記資料，呢架波子車主係勞工及福利局助理秘書長林俊華Parson，專責福利政策。唔係發生呢次意外，都唔知政務官都鍾意揸跑車去開會。Parson係80後AO，03年科大畢業，05年加入政府。
言歸正傳，葉劉座駕今次硬撼其他議員名車，八方大膽假設，覺得好可能冥冥中洩露天機。其座駕先撞工聯會，再撼民建聯，唔通預示新民黨會先向保皇黨搶票？之後再衝着社民連而來，最後連官員跑車都不能倖免，顯示葉劉既不怕丐幫，也無懼官威，呢啲就係霸氣嘞！
葉劉座駕硬撼三大黨派同官員座駕，八方粗略估計，幾架車總值應該逾200萬元。事發後葉劉到場了解意外，當場捉住一個阿Sir詢問事發經過，阿Sir必恭必敬向佢滙報，當正佢仲係保安局局長，其他司機遇上車禍，點會獲此禮待？
據講葉劉司機解釋意外肇因係誤踏油門令架車衝前，事發時唔喺車上嘅葉劉力撐司機，話佢開車六、七年，一向駕駛態度良好，冇出過意外，「一時唔小心梗有，唔會怪責佢」，又向各受影響議員講唔好意思，會負責賠償。

潘珮璆平治座駕最傷

今次炒車意外，最傷係葉劉座駕，左邊車頭凹陷，其次就係潘珮璆架平治，右邊車尾花晒，佢話架平治02年買，維修應該唔使好多錢。幾個議員林健鋒、梁美芬同梁劉柔芬事後紛紛出停車場檢查座駕，大嘆好彩，否則遭葉劉硬撼，肯定好傷。

mailto:[email protected]