新聞界噚日搞國慶酒會，煲呔因為要開粵港合作聯席會議嚟唔到，於是叫頭馬政務司司長許仕仁同律政司司長梁愛詩前來，以示畀面，因為往年老董好識做，差唔多一定捧場。
肥龍許仕仁一到埗就滿場飛，又同徐四民密斟，但啲人行埋佢身邊問政改同西九，佢就當然唔答啦。
除咗肥龍同詩姐姐，民建聯主席馬力噚日都好受行家歡迎。近期最受關注嘅事項，就梗係政改方案啦。經過政府一輪放風，方案究竟係點，大家好應該有眉目。新增五個功能組別，如無意外都會落入區議會界別手上；至於八百人選舉委員會，好有機會增加到千六人。
馬力貴為民建聯主席，梗係要講吓對呢個方案嘅意見啦，點知馬力一講起呢樣嘢，就好得得戚戚咁話，自己好似兩、三年前，亂打亂撞都提過類似意見，尤其係選委會要加到千六人。

暗示煲呔抄佢條橋

咁咪即係煲呔同肥龍抄馬力條橋，不如個政改方案改做「馬力方案」啦。馬力聽到就只係笑一笑。至於民建聯喺呢個方案下，係咪得益？馬力就話佢哋未必選到，甚至可能一個議席都無，真係唔知信唔信佢好。
咁民建聯又會唔會支持呢個方案呢？馬力查實都冇正面回應，只係話會以開放態度看待。不過，佢就相信，強政勵治嘅煲呔新政府，對方案都係有把握嘅，換言之，專責政改嘅肥龍，咪唔使驚孭鑊而落台啦？馬力聽到都點晒頭，佢話民建聯都唔想「隊冧」肥龍，亦唔想有人因政改過唔到下台，有咁嘅悲劇出現對新政府冇好處，煲呔啱啱先至有啲威信。估唔到馬力都幾有憐憫之心。
對另一熱門話題——行會人選，馬力話香港定位係金融中心，唔介意新加入行會成員全部嚟自財經界，至於基層，𠵱家都有晒代表，唔使增加。八方咁啱撞到行會熱門人選范鴻齡，問到佢行情看漲，佢就無講嘢，笑笑口走開。

傳真︰2623-9278
電郵︰[email protected]