疫情嚴峻，社區活動悉數取消，製作人陳顗玲直言，工作室上月收入歸零，暫時未敢樂觀。與其坐井觀天，她說不如積極面對，趁空檔自發到深水埗向露宿者派防疫物資，還夥拍熱心太極師傅，義拍適合蝸居的「防疫六式」，讓因疫情無法外出晨運、被迫自我隔離的獨居長者，可透過簡易短片居家強身。「人總係有浮躁嘅時間，藉禪修同太極，令自己學習慢下來。」鏡頭背後偷師，曾患情緒病但已康復的小妮子，笑說這不但助人，更是助己。

記者 呂麗嬋

走進鑽石山工廈，鎂光燈下盡是穿上唐裝衫褲的武林高手，一招「氣貫長虹」，再來「獅子搖頭」，作結的「金雞獨立」，原來還有「簡易版」，方便平衡力麻麻的「老友記」，跟着學一樣應付自如。「OK，師傅，可唔可以再嚟多次？」「細寶」陳顗玲指手劃腳，在旁的攝影師盧永豪在度鏡頭，做編審的馮婉琴就忙不迭抄寫招式。他們仨都是資深傳媒人，拍這樣的功夫短片，易過借火，但一樣全力以赴，打着四支大光燈的臨時片場，人人一臉認真。

「呢段時間，好多活動都取消晒，對電視製作亦有好大影響，好多製作公司嘅朋友都要被迫放無薪假，與其好空閒無嘢做，不如趁呢段時間，同唔同團體合作，就好似製作呢啲短片，唔好話幫好多，至少令老友記可以喺屋企跟住做，身體強壯啲，病痛都可以少啲。」細寶說。疫情下，香港人的生活亦大受影響，為免聚集，康文署轄下的健身室關閉無期，就是早晨的晨運班亦不見影。

「口罩又唔夠，我要幫手湊孫，啲仔女叫我唔好出去晨運，自己惹到仲惹埋啲孫就大件事，咪日日屈喺屋企囉，唔係可以點啫？」已兩個月無參加街坊太極班的梁婆婆說。疫情嚴峻，市民「禁足」外出，免去人多聚集地方，「太極聯盟義工隊」隊長何焯明，表示聯盟自去年成立以來，除在各區義教太極，亦走進醫院及老人院開班，惟在疫情下，活動悉數取消，他苦笑謂不少「年紀大過佢嘅徒弟」都說在家屈到病。

有兩個膊頭位嘅空間就可以跟住做

「講真係未染肺炎死已經嚇死咗。」何焯明苦笑。每日返工前在鳳德公園義教太極的曾玉梅亦感同身受，20年前因為心臟病而與太極結緣，曾師傅笑言：「學打太極嘅人十個有九個背後都有個故事——我以前鍾意跑步，又會行山，突然話要學太極，好多都因為身體出咗毛病，我當年都係因為心臟有事，行幾級樓梯都喘到死，做唔到劇烈運動先去學。最初好睇唔起，以為好簡單，跟住擺幾吓手就係，到認真學先知好多學問。」穿上桃紅色唐裝衫的她氣定神閒的說。

由以為阿婆先學，到自己都成了半個阿婆，曾玉梅說加入義工隊，與其他太極師傅四出義教，都只為將強身健體的訊息發揚光大。「好多老友記屈喺屋企，唔出嚟走動，退化得特別快，短片係為佢哋度身設計，抽取太極套路中部份招式，只要喺屋企，推開張飯枱，有兩個膊頭位嘅空間就可以跟住做，每日練5至10分鐘，疏通經絡，可助提高免疫力，依家咁多病毒，keep住做運動好緊要。」

與其坐井觀天，不如積極面對，「細寶」陳顗玲趁空檔與拍檔自發到通州街公園向露宿者派防疫物資，又抽空義拍短片，希望幫到有需要的人。善拍公共事務題材，於2017年成立工作室，細寶說四名成員中還包括一名社工，過去曾參與拍攝認知障礙症等系列探討社會問題的民生影片。「人總係有浮躁嘅時間，藉禪修、太極，令自己慢下來。」她直言過去一直投入工作，年前受情緒病影響，早在疫情前，生活節奏已因病被迫慢下來。

「做義工，其實係人哋幫到自己好多」

「嗰時朋友帶我出嚟做義工，一來分散吓注意力，可以令自己情緒穩定啲，亦可以接觸吓個世界⋯⋯每一個做義工嘅人，最初都係以為幫到人所以好開心，但其實係人哋幫到自己好多。」病榻中反思生命中孰輕孰重，細寶直言是意料之外的收穫。「媽媽做家居維修義工多年，直至佢往生，偶然機會下佢服務嘅機構通知我，話媽媽有一個服務25年嘅獎牌，希望我可以代領，係好受感動，持續咗25年係好大嘅堅持，我都希望可以佢為榜樣。」小妮子說。

民間自發拍攝的蝸居強身短片，透過社福機構以及不同網絡平台在社區發放，鼓勵宅經濟下市民在家看片自學強身健體；另由於疫情在全世界散播，稍後短片亦將製作英語版，方便外國人學習，有興趣的朋友可載入以下連結：家居強身運動系列《六式太極拳行功心法》 。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
【撐學生】
召集有心人 撐學生全年睇《蘋果》
立即按此