日本組合SMAP已經解散，三位成員草彅剛、香取慎吾及稻垣吾郎決定離巢，前日約滿離開尊尼事務所，三子暫時未簽約其他事務所，現階段以獨立姿態發展。

噚日，香取慎吾繼續主持晚上播出節目《SmaSTATION!!》，位於六本木嘅朝日電視台門外站滿約300粉絲為香取打氣，佢抵達電視台換咗西裝之後，喺10名保安護送下再出嚟見粉絲，香取話晚上會繼續努力，仲叫粉絲快啲返屋企睇電視，現場有女粉絲就激動得當場落淚。而香取當晚如常演出呢個直播節目，完全冇提到離開尊尼事務所，同埋關於佢嘅日後發展。至於草彅剛同稻垣吾郎據指喺離巢首日並冇工作，各自喺寓所渡過。

跟三子鬧不和嘅木村拓哉日前喺電台節目開咪，仲點咗SMAP歌曲《This is Love》送予三位舊隊友。而反口繼續效力尊尼嘅中居正廣雖然喺電台節目上冇提過舊隊友，但報道就話中居都有買咗名牌袋畀三位舊隊友，作為道別禮物。