香港電影金像獎今日喺尖沙嘴舉行評選事務組會議，研究第二輪投票是否如香港影業協會(洪祖星代表)提出，取消專業評審部份55%，將之與13屬會一齊，一人一票。(新聞連結: http://bit.ly/29QV37K )

今日有份出席會議的，包括香港電影製作行政人員協會(製片會)主席田啟文、導演會代表祖哥張同祖及香港演藝人協會代表肥媽瑪利亞（MariaCordero）等總共13個屬會嘅代表，但未見老闆會(香港電影商協會)的林建岳、林小明、黃百鳴現身。

會議於今午4點舉行，至6點半完結。離開嘅時候祖哥話冇嘢要發表，田啟文話佢今日係以「評選組副組長」身份列席，所以佢所代表嘅製片會另外有人出席。田啟文話：「今日13個屬會都有代表，今日開會冇投票，屬會代表各自嘅會發表意見同理據，氣氛好愉快。發表完就交畀董事局，純粹講意見，冇贊成冇反對。」

田啟文話製片會一早表達咗意見，肥媽就話投票已經唔關佢哋事，係之後董事局嘅問題。講到製片會取態，田啟文話之前喺電台都講過：「如果行業之前有問題，即係成件事有問題；如果冇問題，咁即係今次件事係冇問題。」但田啟文重申，上述言論只代表他本人立場，並不代表製片會。

田啟文於商台節目中，亦表明：「我個人雖然唔同意俾個獎《十年》，但係我尊重投票嘅決定，呢個係體現我哋電影界同香港社會嘅自由。如果連有人投票都唔尊重，或者要投咗票嘅人道歉，我覺得好恐怖。我哋做錯咩啫？我去投一個獎咋嘛！做咩要搞到上綱上線？」