黃貫中同囡囡黃鶯、陳小春同囝囝Jasper之前分別參加咗大陸親子真人騷《想想辦法吧！爸爸》與及《爸爸去哪兒6》，本來呢個節目會喺暑假播映，點知喺出街前夕，成個節目突然叫停，原因話大陸嘅廣電總局發佈咗一份「未成年人節目管理規定」，即係節目唔可以宣揚童星效應、炒作明星子女，禁止10歲以下兒童代言廣告等，其中又有一條「避免未成年人親眼目睹家庭矛盾衝突和情感糾紛」，於是要公開徵求意見。

雖然大陸《人民網》報道話呢次徵求意見去到9月23日，即使佢哋完全遵守呢啲守則，都要最少等多一個月先有機會播出，不過《想想辦法吧！爸爸》喺呢個月初話可以喺噚日，即係6號播出，連宣傳片都已經喺微博同官網播出，話晒今次有阿Paul一家，仲有洪天明一家助陣，當然有一定嘅吸引力。(新聞連結： https://bit.ly/2MVd4bh )

結果唔少網民噚晚一心諗住睇節目，點知等極都冇，官網亦都未有任何更新，據大陸傳媒了解，節目的確係再次延播，目前播出時間未定，有唔少網民留言炮轟，覺得有欺騙成份，事實上有網民為咗呢個節目而專登俾錢做VIP，會籍就嚟過期，都未睇到，搞到唔知應唔應該再續約，甚至有人話已經等到冇興趣，就算再播都唔會睇。

精選娛聞，喺晒《娛果》
http://fb.com/appledailyent