將軍澳厚德邨號稱全港最貴的領展（823）街市，記者來到現場視察，其實還未被領展「翻新」，即是未到加租加得最勁的「時機」，不過其實仍然是相當貴租，在厚德街市開檔八年經營配匙的李先生在他約100方呎的舖位，月租要13,000元，呎租高達130元。

李先生指去年9月才跟領展續租：「嗰時佢加咗我一成九租，簽咗兩年約，睇嚟出年佢都會收返個街市再翻新，都唔知做唔做到。呢個舖以前房署做時先至租7,000元。」他指自己已加價才能應付租金：「最平一條匙要由5蚊加到6蚊，其他貴匙加得仲多，但我都唔敢加太多，怕冇人幫襯。呢度物價應該全港最貴。」

另外有經營麵食雜貨的老闆娘則透露其百多呎舖位要月租要30,000元：「生意梗係差啦，你睇冇乜人流，加租係多，但唔方便講加幾多，領展會鬧。」

另外有藥材舖及生果檔東主均表示租金很貴，陳姓生果檔東主更指：「呢度係全港最貴嘅街市，你話啲租貴唔貴呢？」其中一間賣有機菜的舖位，只得二百多呎，但舖租竟然高達10萬元。

其實厚德邨有幾貴？記者找過價錢「冇咁海鮮價」的凍肉作比較，厚德邨的凍肉哺，一磅墨丸售34元，但在觀塘由食環管理的瑞和街街市，一磅墨丸只售25元，厚德邨足足貴36%。

厚德邨商場是領展正在翻新的商場之一，街市都難逃翻新加租命運，屆時厚德邨居民難免要繼續捱貴餸。

掌握財經生活資訊，即Like「蘋果ATM」fb專頁啦！
http://fb.com/appledailyatm