劉德華上月中喺泰國拍廣告墮馬受傷，唔經唔覺喺跑馬地養和醫院都住咗超過兩個幾星期，傳媒一直留守醫院採訪，呢兩日唔見朋友去探華仔，反而有唔少藝人去養和睇醫生，大部份都係感冒之類病痛，呢排天氣時暖時冷，真係要小心啲，着少件衫都好易瀨嘢!

今日大約中午12點，林二汶帶住口罩去到養和，有助手陪住，見佢拎住袋咖啡，一支箭行入醫院，睇完醫生又好似一陣風就快快走人。原來佢係因為傷風感冒睇醫生，就唔係探華仔。跟住到大約5點左右，就見戴住口罩嘅范姜帶住鍾嘉晴同鍾幗兩個女出現，問係咪探華仔，范姜就話：「唔係，BB（鍾幗）唔舒服，新年快樂，bye bye！」

鄭則士同張兆輝都有出現喺養和，佢哋喺6點左右一齊走，問到華仔情況？鄭則士話：「進展非常良好，同佢傾過偈，把聲比之前清咗好多，關心佢嘅朋友可以放心，但佢需要繼續以後物理治療，佢交帶我哋同各位講放心放心，佢一定康復，順順利利。」講到幾時可以出院？鄭則士表示呢個要問番醫生。

問到華仔係咪肥咗？張兆輝話：「好精神！」鄭則士話：「精神非常良好，唔係佢返嚟入院嗰剎那，我哋都好放心。」華仔可以坐起身？鄭則士話：「未住，不過都快。」華仔仲有冇咁痛？鄭則士話：「好咗好多，話唔痛當然唔會係，到佢康復到差不多，佢會同大家再交待。」見唔見到華仔囡囡？鄭則士笑謂淨係會講華仔嘅事，而且佢表示見完華仔後，成個人都放心晒！