內地男星文章早前被爆背住老婆馬伊琍，偷搭小三姚笛，不過最後都得到馬伊琍原諒，之前有網民仲目睹馬伊琍仲陪文章去醫院睇醫生，仲俾網民發現佢哋一家三口早幾日齊齊嚟咗香港，仲去埋灣仔入境處辦手續，疑似舉家申請做香港人。

噚日係文章30歲生日，內地男星霍政諺喺微博上載兩張同文章、馬伊琍企喺生日蛋糕前嘅合照，寫住：「文章同學，三十而立！生日快樂！你也30了，以後再說我老老子弄你！」喺其中一張相，馬伊琍同霍政諺都有吻賀壽星仔，老婆嘅獻吻，搞到文章相當開心！

相片曝光後，惹來好多評論同轉發，有人祝福文章兩公婆和好如初：「如果真的離婚了受傷害的只有孩子，所以看到這個我們還是祝福吧。。。為了孩子」，亦有人嘲做小三冇好下場：「姚笛可憐個毛線！當初自己不知道離已婚男人遠點！小三永遠都沒有好下場！」有網民連霍政諺都拉埋落水，話：「霍先生打敗姚笛成功上位。」

咁姚笛依家又去咗邊呢？原來一個人去咗英國散心，仲有圖。自從與文章婚外情曝光後，姚笛除咗匿埋拍戲之外，一直冇公開露面，反而被爆成日去外地散心，之前就曾有網民爆料話佢喺莫斯科，依家就話喺英國喎。