煲呔施政報告引發慳電膽風波，搞到民望急跌，但佢就發揮阿Q精神，繼續安心瞓覺同選擇性出席殺傷力較輕嘅活動。噚日煲呔出席青協一個活動，學生唔提慳電膽，連政改問題亦全程無人提問，可惜煲呔避得政改，避唔到民生，因為份無料到施政報告，一樣要被學生哥踩幾腳。
煲呔噚日出席網上電台uChannel台慶，初時以為壓得住，好有信心咁叫學生發表唔同嘅言論。
一班後生仔越問越積極，到一名姓伍嘅女大學生發問時，煲呔話聽唔清楚人哋個名，兇個女生：「個名好重要o架，小姐！」難得女學生冇被嚇窒，繼續插政府唔監管勞工同汽車保險，只識將個波踢畀市場，搞到小器煲呔忍唔住爆咗句「伍小姐，你小心啲……」跟住即刻補飛話原來係想叫個女生「放心」。之後有中大女生唔知有心抑或無意，接住提問時幫煲呔「降呢」，叫佢曾司長，搞到煲呔又黑面。

facebook群組向煲呔舉中指

終於有人提到煲呔最棹忌嘅民望問題，佢黑住面話民望呢啲嘢，佢會小心聽，「但唔可能作為自己榮辱去睇呢個問題」。去到尾聲，佢寄語年輕人，指人生有好多坎坷嘅地方、好多挑戰，叫大家最緊要有耐性、忍耐力。現時飽受政府劣政影響嘅市民，睇怕都要畀多啲耐性，忍多兩年。
講到末段，煲呔講到做特首若有所感，「好多人話想做，實情上，我都覺得（特首）未必係一個好好職位都未定，如果有得選擇，未必個個都想做呢個職位。」煲呔講到特首份工咁惡頂，難得在場約40位青年，喺主持一聲令下，紛紛舉手指公幫煲呔打氣；台上嘅煲呔見咁多人直豎拇指，笑容即刻返晒嚟，總算開開心心咁離場。同樣舉起手指，前日喺禮賓府示威，到最後俾警察抬返差館嘅幾十名網民，就喺facebook成立「抗爭前烈線」組群向煲呔舉手指，不過嗰隻係中指！

mailto:[email protected]