童星出身、曾於古裝劇《懷抱太陽的月亮》入面飾演少年金秀賢嘅呂珍九，將於下月12日來港舉辦首個香港簽名會。

當日下晝6時半，呂珍九將現身上水廣場進行聖誕亮燈儀式，之後就開簽名會，首次近距離會港迷。

呂珍九早前拍攝電影《西部戰線》時手指受傷，前往醫院嘅路上，更嚇至休克暈倒，佢表示自己受傷後好擔心會影響電影嘅拍攝進度，好彩傷勢唔太嚴重，不過就令身邊嘅家人同朋友擔心，感到好抱歉。

另外，依家仲讀緊書嘅呂珍九正面對高考壓力，雖然佢覺得學業繁重，不過仍會爭取休息時間於片場溫書，佢仲表示希望可以成功考上大學，感受一下大學嘅校園生活。