喺2004年承認同金利來三少曾智明離婚嘅黎瑞恩，前排在微博貼咗一張錄音室嘅相兼留言話：「大家好嗎？我返嚟喇」、「又可以再做我最鍾意嘅嘢喇」，結果唔少fans留言問係咪復出唱歌，小恩子接受《蘋果》訪問嗰陣話要保持神秘感。

今日有周刊報道，原來小恩子喺囡囡凱栭嘅鼓勵下，決定復出，嚟緊會推出一隻HiFi碟，翻唱陳奕迅、黎明同黃耀明等人嘅歌。小恩子話今年9月囡囡會去澳洲讀書，佢同囝囝就留喺香港，阿囡叫媽咪唔使擔心，佢哋已經大個，叫媽咪即管去做想做嘅事，再加上好友TommyChu又搵佢出碟，結果一直最愛唱歌嘅小恩子決定復出。

酬勞方面，小恩子話今次冇特別收任何錢，Tommy只係畀咗一張普通新人合約，雖然最初小恩子有為呢件事唔開心，喊爆打去鬧Tommy，不過Tommy話呢個只係基本合約，隨時可以加條款，最後小恩子覺得反正都冇乜要求，不如大家認真做件開心事。

講到離婚後嘅生活，小恩子話同鄭應南一直只係好朋友，佢覺得由老朋友變成戀人，感覺好奇怪，所以唔知有冇發展機會，而且就算合適對象，佢唔會再結婚。小恩子亦都有提到前夫曾智明，佢除咗每月有俾贍養費之外，囡囡出國讀書都係佢俾錢，老爺奶奶亦對佢好好，俾咗一筆好大嘅錢佢去買樓。

至於囝囝浩儒，小恩子話囝囝患有亞氏保加症，亦即係高智能自閉症，總之佢同溝通嘅方法令到人覺得驚，o依家轉咗一間新學校，加上又用自然療法，將一啲唔好嘅物質釋放出嚟，情況有所善，所以佢計劃2年後俾囝囝去美國讀書。