獅子行員工今年放多日有薪假？係，大家冇聽錯！鑑於2015年係滙豐在港開業150周年，為答謝員工辛勞付出，滙豐香港區總裁施穎茵，原來早於舊年10月底，已經向香港全體員工發出內部電郵，指今年將會一次性額外有1天「150周年有薪假」。
至於實際邊日放，就要各員工自行跟部門主管安排協調。不計恒生銀行（011），滙豐在港約有兩萬名員工。據聞，唔單止香港員工有多日假，集團喺全球廿幾萬員工，今年同樣獲贈多1天有薪假。呢個150周年假係一次性，2017年就冇㗎嘞。
獅子行成立150年，正日其實係舊年3月3日，呢個周年假期竟然唔係舊年放，而係今年放，都幾特別。
據聞，主要因為「一姐」施穎茵嘅通知，喺10月底先至發出，距離年底只有兩個月，未必夠時間畀所有同事喺年內放到呢日假，所以延至今年推行，時間鬆動啲咁解。至於點解舊年初慶祝時又唔講埋，就無從稽考嘞。