韓國女星宋慧喬早前已完成同宋仲基合作嘅新劇《太陽的後裔》，劇集將於本月24號播出，而喬妹近日就被爆斥資90億韓圜(約5,850萬港元)購入首爾三成洞嘅豪宅，仲好鬼孝順將間屋轉去母親名下。

根據有關人士透露，喬妹本來住喺呢區，最近又斥資購入了另一棟豪宅，並將豪宅歸入母親名下，最近亦已經重新裝修，有可能日內搬家。

至於喬妹同宋仲基合作嘅新劇《太陽的後裔》今日劇情版預告亦都公開。新預告以宋仲基「我係軍人」、喬妹「我係醫生」嘅獨白開始，從喬妹等人乘搭直昇機到達救災現場，然後一幕幕救援、離別、犧牲等震撼人心嘅場面，都引起觀眾嘅興趣。除左兩位主角之外，預告仲有晉久、金智媛、男團SHINee成員溫流等主演嘅身影，更加令人期待。

另外，劇組亦喺噚日公開咗溫流嘅劇照，係劇組第一次公開男女主角之外嘅演員嘅劇照。溫流喺劇中飾演一位只有一年資歷嘅心臟外科住院醫生，成日都畀前輩嘅鬧但鬧極都唔嬲嘅開朗派。