蒙牛（2319）創辦人牛根生禮拜一爆出一封萬言求救信，哭求內地企業老總幫忙，對抗外資敵意收購。封信仲透露，除咗聯想控股老總柳傳志即時打電話應承借出2億銀人仔；中海油（883）董事長傅成玉亦call牛根生，豪爽話：「中海油備了2.5億，甚麼時候需要甚麼時候取。」
呢幾日網友爭相討論「傅成玉誇口借2.5億」事件，批評中海油係國企，又唔係傅家私產，傅總何來妄言「甚麼時候需要甚麼時候取」。《每日經濟新聞》記者前日打電話畀中海油總公司，查問借錢真相，傅成玉冇親自回答，只透過相關負責人回應：「傅成玉從來沒有給牛根生打過這個電話，中海油更沒有給過牛根生2.5億的承諾。」

要國資委批

呢位負責人仲話，中海油係控股公司，如果要動用上市公司任何一分錢，為董事會成員以外的企業做擔保，必須董事會三分之二嘅董事贊成；如果動用總公司嘅錢，更要國資委批准。
講到咁官腔，睇嚟傅成玉義氣借錢單嘢，都係美麗嘅誤會，但點解傅總唔親自出嚟同記者澄清，唔使大家估估吓，以為佢咁把炮呢。