【新增動新聞】
「雲格唔係未試過，雲格試過安份守己，日搏夜搏，賺得嗰一個英足盃決賽席位。雲格試過，但出面嗰班人呀，佢哋識管數識揀幼齒咩？點解要用以前成隊波嘅薪酬去買一個球星呀？因為啲有錢佬喺度玩嘢呀！越有錢越有得玩呀！呢個世界公平咩？」就算阿仙奴近期戰績反彈，殺入英足盃決賽之餘，聯賽前4亦未絕望，但「反雲黨」一樣冇留手，周五晚仲整咗個#WENGEROUT帶你遊倫敦嘅活動！

雖然嚟緊周日就係北倫敦打吡，但廠迷唔單止冇同雲格大團結，更喺周五晚透過投影技術，將#WENGEROUT嘅訴求發佈喺阿仙奴新舊主場酋長同高貝利球場嘅外牆，就連熱門旅遊景點大理石拱門Marble Arch一樣有份。據報相關球迷組織去到季尾仲有搞作，各位拭目以待啦。