近期睇英超比賽，有悶透、甚至討厭之感，支持的球隊表現出來的水平，是我近10年所見最差劣；但最糟是，英超比賽入球量大減，弱隊面對Big4以1分為目標，上位球隊打4-5-1，甚至享受無鋒歲月，0:0波膽不斷開出，成4大聯賽之辱！
根據足智彩統計，截至上周六，英超今屆上演了240場比賽，0:0波膽竟佔了10%，連同主客贏1:0比數，已佔全部賽事近30%（德、意甲交白卷比賽同期只佔4%，而西甲佔5%）；從賭博角度看，近期長買Big4入球「細」真係贏到笑；相反卻苦了現時每星期坐在家中，捱凍捱夜睇直播的球迷。

維拉簽希斯基有鋒力

強如曼聯也不介意滾魚生粥，其他3隊更不堪提，尤其阿仙奴，4位前鋒輪流擔綱雙箭頭，卻因中場法比加斯長「唞」，輸送乏人，遇到入球荒；利物浦常只靠謝老四單打獨鬥，車仔的單箭頭戰略，也未見奏效。
大家以為上位球隊像維拉及愛華頓會惹人好感，但其實他們今屆常出現無鋒可用或有鋒不用；尤以愛華頓，喜用攻擊中場卡希爾打單箭頭抗前鋒荒，而維拉好在領隊奧尼爾識貨，剛平價簽入柱躉中鋒希斯基，加上超強的雙快翼艾邦拉荷同艾舒利楊格，預計他們下半季的比賽會較好睇。
比賽沉悶，加上「現在」大部份評述員喜將一些無聊不實的英國小報轉會消息，當成事實不斷轟炸波友；如上周六晚，不斷話艾沙維已肯定投阿仙奴，現只差工作證，有誤導之嫌；其實大部份觀眾希望聽到的是比賽中的專業分析，英超趕客，難道來季又要裝番條「線」睇歐聯？
蘋果波神

（周一）蘋果波神‧（周二）吾中/青蛙仔‧（周三）法比奧‧（周四）藍鑽石‧（周五）牽牛/畢傑‧