大台前新聞王子柳俊江於6年前娶妻雷康怡(Florence),前年升呢人父,老婆為佢生咗囡囡Bella,現時囡囡約兩歲,估唔到佢哋咁快手又有咗,Florence本月就再生B,呢胎仲係囝囝,三年抱兩,成功湊成好字,柳爺話老婆肚皮可以收工。
現年35歲嘅柳爺,跳出公仔箱,佢又拍戲又做主持,仲會做埋廣告導演,幕前幕後多方面發展。柳爺有囡萬事足,不時喺網上貼出囡囡萌照晒幸福。《蘋果》今日致電恭喜柳爺,佢話:「太太未咁快生,呢個月尾先係預產期,呢胎係囝囝。」一女一子湊成好字,佢話:「兩個可以收工。」
柳爺話Bella好懂事,佢都知道即將做家姐,佢話:「Bella都知知哋,我哋開頭懷疑係咪再有咗BB。我哋叫佢如果係有,你埋去錫媽咪個肚一啖,佢真係去錫咗,第二日太太去驗,真係有咗喎。Bella現時會指住媽咪個肚,佢會行埋去媽咪個肚指住同錫落去。」Bella最搞笑係會模仿埋媽咪大肚,柳爺又話:「佢又會用公仔攝入自己件衫扮大肚,猛叫細佬呀,有少少意識,但唔係好清楚。」
柳爺為迎接新成員準備就緒,囝囝「腳頭」超好,帶挈爸爸呢排工作量大增,佢話:「最近好忙,接咗四、五個執導廣告,希望交晒貨,咁我安心陪太太入醫。」柳爺話未有複雜心情,始終生完第一胎相隔唔耐,一切好ready!