馬些路日前同皇馬續約5年，將會留效到2022年，而出席記者招待會宣佈續約時，佢接受傳媒提問，問到同佢合作過嘅最佳球員，佢立即首推隊友基斯坦奴朗拿度。

佢喺記招上咁講：「我同過好多偉大球員一齊踢過波，好似朗拿度（大哨）、朗拿甸奴、雲尼斯特萊等等...但因為我同佢練波練得最耐，亦傳過唔少波畀佢，仲一齊慶祝，我所講呢個人，就係基斯坦奴。」

C朗好波係人都知，揀佢其實都好正常，但可能馬些路亦聽過前隊友沙比阿朗素當年貼紐亞捧金球獎，結果好似激嬲C朗，諗諗吓嚟緊五年仲要同C朗做隊友，唔通揀第二個咩！不過，馬些路亦有畀面國家隊隊友尼馬，話對方係佢遇過最難搶到腳下球嘅球員。