【超渡亡兒】陸永老婆Reina陀第三胎不幸流產
陸永老婆Reina
農夫陸永同C君喺大台節目《Do姐再Shopping》人氣再急升,網民讚佢哋啲食字gag唔會夾硬嚟,又有幽默感,原來陸永近日飽受傷痛。
今日有周刊指陸永老婆Reina日前陀第三胎時,不幸流產,佢哋搵咗玄學家吳佩孚嘅師兄,為男嬰做法事,超渡亡兒,其後即使一家人出外,陸永亦心事重重,頗為疲累。事後陸永回應周刊坦言冇幾耐之前有個小朋友冇咗,目前都唔會考慮再追一個,吳佩孚則回應周刊稱Reina係容易接觸到靈界,之前Reina感覺身邊有個小朋友跟住佢,所以先做法事求個心安。
Reina現時心情已平復,如常照顧兩個囡囡,今日貼出受傷相,留言:「街市買完餸完美仆低,點仆仆到呢個位腫咗兩粒波子出嚟。」佢仲話細女陸一心研究咗媽咪個傷勢好耐,似乎好擔心,原來係擔心以後冇人車佢返學,擔心爸爸要搭的士接放學,又擔心搭的士唔可以食嘢,佢會好肚餓。
對於太太早前不幸小產,陸永透過短訊回覆:「太太跟我都很好,多謝關心!」問到兩人如何扶持度過難關?他表示:「順其自然,湊住兩姐妹都夠煩夠開心了。」之後陸永接受電話訪問,問到事件幾時發生?當時喺太太身邊嗎?陸永表示:「多謝關心,我哋o依家已經平復好晒,太太身體亦都冇大礙,全部嘢都好好,之前嘅事唔想重提。」胎兒係咪男仔?醫生有解釋為什麼小產嗎?陸永話:「係唔係男仔我哋都唔知,我哋都唔清楚,點解會咁,真係冇原因,唔好彩咁囉,係囉,o依家好好。」
更多娛聞,喺晒《娛果》
http://fb.com/appledailyent
陸永老婆Reina今日喺Ig貼出受傷相,指自己仆親。網上截圖