周星馳同于文鳳拍咗拖7年幾，聽聞佢嘅財政大權早已交喺女友手中，近幾年嚟佢喺地產投資大有斬獲，真係要多得女友投資有道，所以于文鳳早已成為星爺嘅結婚對象，但估唔到日前竟然有報道話星媽接受咗記者電話訪問，話個仔炒樓有合作夥伴，根本同女友冇關，對於有傳聞話于文鳳已經懷孕，星媽竟然爆料話佢哋已經一年冇來往，只有公事來往，仲話唔敢講于小姐有冇懷孕，就算有，都質疑係咪星仔嘅。
聽星媽語氣，似乎對于文鳳唔多有好感，難怪于小姐到𠵱家都未入門啦！不過星媽話個仔同女友分咗手，未必可以盡信，因為上個星期先至有人撞到星爺同于文鳳食飯，而且態度親密。星媽咁講，又真係幾耐人尋味！

「個仔嘅好朋友都冇見」

馮仁昭問過星爺，佢唔想回應，但星媽就澄清話：「我的確有接受過訪問，但我嘅意思被誤解咗，我指過去一年因個仔拍緊《長江7號》，自己成年冇見過個仔，咁個仔嘅『好朋友』都冇見過啫！其實個仔嘅事我係好少理，佢嘅感情事就更加唔清楚。」
此外，《長江7號》又有新預告片推出，今次仲有廣東話版本。今次嘅片段長達兩分鐘，除咗繼續有外星狗出現，仲有星爺同女主角張雨綺嘅談情場面，以及徐嬌嘅飛天戲。